Homeతెలుగు Newsసినిమా‘పుష్ప - ది రైజ్’ మూవీ రివ్యూ: తగ్గిందిలే..!

‘పుష్ప – ది రైజ్’ మూవీ రివ్యూ: తగ్గిందిలే..!



photo 88335979

‘రంగస్థలం’ సినిమా వరకు ఒక లెక్క.. ఆ తరవాత ఒక లెక్క.. ఇదీ సుకుమార్‌పై సగటు ప్రేక్షకుడికి ఉన్న అభిప్రాయం. ‘రంగస్థలం’కు ముందు సుకుమార్ సినిమాలో లెక్కలు కనిపించేవి. ఆయన లెక్కల్ని సాల్వ్ చేసుకుంటూ సినిమాను అర్థం చేసుకోవాలంటే ఇంకోసారి చూడక తప్పేదికాదు. కానీ, ‘రంగస్థలం’తో ఒక గ్రామీణ, అందమైన కథను తెలుగు ప్రేక్షకులకు సరళంగా అర్థమయ్యే రీతిలో సుకుమార్ చెప్పారు. ఆ వెంటనే అలాంటి వాతావరణంతో కూడిన ‘పుష్ప’ సినిమాను ఆయన ప్రకటించడంతో ఒక్కసారిగా అంచనాలు పెరిగాయి. అందులోనూ ఎర్రచందనం స్మగ్లింగ్ బ్యాక్‌డ్రాప్ అనడంతో ఆయన మరో కొత్త కథను చూపించబోతున్నారని, బొమ్మ అదిరిపోవడం ఖాయమని ప్రేక్షకులు ఒక అంచనాకు వచ్చేశారు. మరి సుక్కు ఆ అంచనాలను అందుకున్నారా? చూద్దాం.

కథ
‘పుష్ప – ది రైజ్’.. టైటిల్‌లోనే ఉంది కథాంశం. ది రైజ్.. ఎదుగుదల, పుష్ప ఎదుగుదల. ఎర్రచందనం స్మగ్లింగ్ చేసే కొండారెడ్డి (అజయ్ ఘోష్) దగ్గర కూలికి చేరిన పుష్పరాజు.. ఆ సిండికేట్‌నే ఏలే రారాజుగా ఎలా ఎదిగాడు అనేదే ‘పుష్ప’ పార్ట్-1 కథ. ఈ ఎదుగుదలలో తనకు అడ్డొచ్చిన మంగళం శ్రీను(సునీల్)ను ఎలా తొక్కేశాడు.. తాను ఇష్టపడిన శ్రీవల్లి(రష్మిక మందన)ని ఎలా దక్కించుకున్నాడు అనేదే సినిమా.

విశ్లేషణ
చిన్నప్పుడు కష్టాలు, అవమానాలు, ఛీత్కారాలు ఎదుర్కొన్న ఒక వ్యక్తి.. వాటినే తన విజయానికి మెట్లుగా చేసుకుని రాజుగా ఎదిగిన కథలు ఇప్పటి వరకు ఎన్నో చూశాం. ‘పుష్ప’ కథ కూడా ఇంచుమించుగా అంతే. కాకపోతే దీనికి చిత్తూరు యాస, శేషాచలం మట్టి వాసన అద్దారు సుకుమార్. తెలుగు ప్రేక్షకుడికి పూర్తిగా ఒక కొత్త అనుభూతిని పంచే ప్రయత్నం చేశారు. హీరో దగ్గర నుంచి విలన్ దగ్గర పనిచేసే చిన్న క్యారెక్టర్ వరకు ప్రతి పాత్రను కథకు తగ్గట్టు తీర్చిదిద్దడంలో సుకుమార్ 100 శాతం సఫలమయ్యారు. అయితే, అందరికీ తెలిసిన కథనే ఆకట్టుకునేలా చెప్పడంలో సుక్కు పూర్తిగా సఫలం కాలేకపోయారు. ముఖ్యంగా సెకండాఫ్‌ను సాగదీసి థ్రిల్ లేకుండా చేశారు. మరీ ముఖ్యంగా ప్రీ క్లైమాక్స్, క్లైమాక్స్ సీన్స్ నీరసం తెప్పించారు.

‘ఇది నా కాలు.. ఇదీ నా కాలే.. నా కాలు మీద నేను కాలేసుకుని కూసుంటే మీ ఓనర్‌కేందబ్బా నొప్పి’ అంటూ పుష్ప టెంపర్‌ ఎలా ఉంటుందో పరిచయం చేసిన సుకుమార్.. ‘పుష్ప అంటే ఫ్లవరనుకుంటివా.. ఫైరు’ అంటూ మంగళం శ్రీనుని భయపెట్టే వరకు కథను పరిగెత్తించారు. అయితే, ఆ తరవాత సెకండాఫ్‌లో వచ్చే సీన్లు అంత ఆసక్తికరంగా సాగలేదు. కథనం ప్రేక్షకుడి ఊహకు అందేస్తుంది. ఎర్రచందనం స్మగ్లింగ్ సిండికేట్‌ను తన సొంతం చేసుకోవడానికి పుష్పరాజ్ చేసే ప్రయత్నాలను ఆసక్తికరంగా చూపించలేకపోయారు. కాకపోతే, కొండారెడ్డి తమ్ముడు జాలిరెడ్డి మక్కెలు ఇరగ్గొట్టే సీన్.. మంగళం శ్రీను బామ్మర్దిని మట్టుబెట్టే సీన్ సెకండాఫ్‌లో కిక్ ఇస్తాయి. కానీ, మిగిలిన సన్నివేశాలన్నీ కళ్ల ముందుకు వచ్చి వెళ్తుంటాయి అంతే. ఇక ప్రీ క్లైమాక్స్‌లో పరిచయం చేసిన భన్వర్ సింగ్ షెకావత్ (ఫాహద్ ఫాజిల్) పాత్ర కూడా పెద్దగా ఇంపాక్ట్ చూపించలేదు. బహుశా పార్ట్ 2లో షెకావత్ విశ్వరూపం చూపిస్తారేమో.

సినిమా మొత్తం అల్లు అర్జున్ భుజస్కందాలపైనే నడిచింది. పుష్ప పాత్రలో బన్నీ జీవించేశారు. ముఖ్యంగా డైలాగ్ డెలివరీ అద్భుతం. ఇంతకు ముందు కొంత మంది హీరోలు చిత్తూరు యాసలో మాట్లాడారు కానీ.. బన్నీ ఆ యాసలో ఉన్న ప్లేవర్‌ను పర్ఫెక్ట్‌గా ప్రజెంట్ చేశారు. ఇక బన్నీ నటన గురించి కొత్తగా చెప్పేదేముంది. శ్రీవల్లి పాత్రలో రష్మిక మందన అందంగా కనిపించింది. పల్లెటూరి అమ్మాయిలా రస్టిక్ లుక్‌లో ఆకట్టుకుంది. కానీ, ఆమె పాత్రకు కథలో పెద్దగా వెయిట్ లేదు. హీరో ఇష్టపడటానికి ఒక హీరోయిన్ కావాలి.. ఆమె శ్రీవల్లి అంతే. ఇక కథలో కొండారెడ్డి (అజయ్ ఘోష్), మంగళం శ్రీను (సునీల్), జాలి రెడ్డి (ధనంజయ్), పుష్ప స్నేహితుడి (జగదీశ్ భండారి) పాత్రలకు స్పేస్ ఉంది.

అజయ్ ఘోష్ ఎప్పటిలానే తన పాత్రకు పూర్తి న్యాయం చేశారు. ఇక మంగళం శ్రీను పాత్రలో కొత్త సునీల్‌ని ప్రేక్షకులకు పరిచయం చేశారు. ఈ సినిమాలో సునీల్ తన యాసను మార్చుకోవడం మాత్రమే కాదు.. తన రూపును కూడా మార్చి చూపించారు. పాత సునీల్‌ని కచ్చితంగా మరిచిపోయేలా చేశారు. కన్నడ నటుడు ధనంజయ్ కూడా జాలిరెడ్డి పాత్రలో ఆకట్టుకున్నారు. పుష్పరాజు స్నేహితుడి పాత్రలో జగదీశ్ భండారి కట్టిపడేశారు. ఆయన వాయిస్‌తోనే సినిమా ప్రారంభమవుతుంది.. కథ మొత్తం నడుస్తుంది. పుష్ప కనిపించే ప్రతి సన్నేవేశంలో జగదీశ్ కనిపించారు. డీఎస్పీ పాత్రలో శత్రు కొత్తగా కనిపించారు. అనసూయ పాత్ర నిరుపయోగం. ట్రైలర్‌లో చూసిన పాత్రకు సినిమాలో చూసిన అనసూయకు పెద్దగా తేడా ఏమీ లేదు. అలాగే, విపరీతంగా హైప్ తీసుకొచ్చిన మలయాళ నటుడు ఫాహద్ ఫాజిల్ పోషించిన భన్వర్‌ సింగ్ షెకావత్ పాత్ర కూడా తేలిపోయింది. బహుశా ఈ రెండు పాత్రలు పార్ట్ 2లో అద్భుతం చేస్తాయేమో చూడాలి.

సాంకేతికంగా సినిమా మరో లెవల్‌లో ఉందని చెప్పుకోవాలి. ఏది సెట్టో.. ఏది రియల్ లొకేషనో గుర్తుపట్టలేనంతగా మాయ చేశారు సుకుమార్. ఈ విషయంలో ప్రొడక్షన్ డిజైనర్స్ రామకృష్ణ, మౌనికలకు వంద మార్కులు ఇచ్చేయొచ్చు. ఇక మిరోస్లావ్ కూబా బ్రోజెక్ సినిమాటోగ్రఫీ సినిమాకు మరో బలం. ఆయన కెమెరా పనితనం ప్రతి సన్నివేశంలో కనిపిస్తుంది. ఈ సినిమాతో టాలీవుడ్‌లో ఆయన స్థాయి మరింత పెరుగుతుందనడం ఖాయం. దేవిశ్రీ ప్రసాద్ అందించిన పాటలు ఇప్పటికే జనానికి బాగా ఎక్కేశాయి. అయితే, బ్యాక్‌గ్రౌండ్ స్కోరు అంత గొప్పగా ఏమీ అనిపించదు. ఇలాంటి మాస్ ఎలిమెంట్స్‌తో కూడిన బొమ్మకు మోత మోగకపోతే కిక్ ఉండదు మరి. దేవిశ్రీ అందించిన పాటలు సూపర్ హిట్ అయినా.. వాటిని తెరపై చూస్తున్నప్పుడు మాత్రం అంత గొప్ప ఫీల్ రాదు. ‘రంగస్థలం’లో చేసినట్టు ఈ సినిమాలో సుకుమార్ మాయ చేయలేకపోయారు. ఆకరికి సమంత నర్తించిన ‘ఊ అంటావా మావ’ ప్రత్యేక గీతం కూడా తేలిపోయింది. పాటల చిత్రీకరణ విషయంలో సుక్కు ఇంకాస్త శ్రద్ధ పెట్టి ఉంటే బాగుండు అనిపిస్తుంది. చిత్తూరు యాసలో శ్రీకాంత్ విస్సా రాసిన డైలాగులు సినిమాకు అసలు సిసలు ప్లేవర్‌ను తీసుకొచ్చాయి.

మొత్తానికి ‘పుష్ప – ది రైజ్’ పార్ట్ 1 ఫర్వాలేదనిపించింది. మరి పార్ట్ 2 ఏ మాయ చేస్తుందో చూడాలి. ప్రస్తుతానికి అయితే
పుష్ప.. తగ్గిందిలే..!



Source link

RELATED ARTICLES

LEAVE A REPLY

Please enter your comment!
Please enter your name here

Today's feeds

நிதான ஆட்டத்தால் இங்கிலாந்துக்கு தண்ணி காட்டி சதம் அடித்தார் ஜடேஜா!

இங்கிலாந்து எணிக்கு எதிரான டெஸ்ட் போட்டியில் சதம் விளாசினார் ரவீந்திர ஜடேஜா. இந்தியா - இங்கிலாந்து அணிகள் இடையே 5ஆவது மற்றும் கடைசி டெஸ்ட் பர்மிங்ஹாம் நகரில் தொடங்கியது. ஜஸ்பிரித் பும்ரா தலைமையில்...