ఉదయం ఖాళీ కడుపుతో నానబెట్టిన ఎండు కిస్‌మిస్ తీసుకుంటే ఆరోగ్యానికి మేలు జరుగుతుందని ఫ్యాట్ టు స్లిమ్ డైరెక్టర్‌, న్యూట్రిషనిస్ట్‌, డైటీషియన్‌‌‌‌‌ శిఖా అగర్వాల్‌‌‌ శర్మ అన్నారు. కేవలం 6 నల్ల ఎండుద్రాక్షాలను రాత్రంతా నీటిలో నానబెట్టి తింటే.. ఆరోగ్య సమస్యలు రావని చెబుతున్నారు. నల్ల కిస్‌‌‌మిస్‌లో ఐరన్‌ పుష్కలంగా ఉంటుంది. దీన్ని నానెబట్టి తింటే హైపర్‌టెన్షన్‌ తగ్గుతుంది, రక్తహీనత దూరమవుతుంది.
బరువు తగ్గుతారు..

నల్ల కిస్‌మిస్‌లో ఫైబర్‌ పుష్కలంగా ఉంటుంది. ఇవి తింటే.. మీ కడుపు నిండుగా ఉన్న ఫీలింగ్‌ ఉంటుంది. మీరు ఆహారం తక్కువగా తీసుకోవడానికి సహాయపడుతుంది. ఇందులో క్యాలరీలు తక్కువగా ఉంటాయి. నల్ల కిస్‌మిస్‌ బరువును కంట్రోల్‌లో ఉంచడానికి సహాయపడుతుంది.
రక్తహీనత సమస్య తగ్గుతుంది..
మన దేశంలో దాదాపు 70 శాతం మంది ప్రజలు రక్తహీనతతో బాధపడుతున్నారని నివేదికలు చెబుతున్నాయి. రక్తహీనత సమస్య ఉన్నవారికి, నల్ల కిస్‌మిస్‌ సూపర్‌ ఫుడ్‌లా పనిచేస్తుందని నిపుణులు చెబుతున్నారు. ల్ల కిస్‌మిస్‌లో ఐరన్‌, క్యాల్షియం, పొటాషియం పుష్కలంగా ఉంటాయి. కిస్‌మిస్‌ తింటే ఐరన్‌ లోపం తగ్గుతుంది.
పైల్స్‌కు చెక్..

నానబెట్టిన నల్ల కిస్‌మిస్‌లో ఫైబర్‌ అధికంగా ఉంటుంది. నల్ల కిస్‌మిస్‌ మలబద్ధకానికి ఔషదంలా పసిచేస్తుంది. నల్ల కిస్‌మిస్‌లోని ఫైబర్ ప్రేగు కదలికను ప్రోత్సహిస్తుంది. కిస్‌మిస్‌ తింటే.. జీర్ణ ప్రక్రియ మెరుగుపడుతుంది. మలబద్ధకం, పైల్స్ వంటి సమస్యలను దూరం చేస్తుంది. ఉదరం, జీర్ణ సంబంధ సమస్యలు తగ్గించడంలో కిస్‌మిస్‌ ఔషధంలా పనిచేస్తుంది.
ఎముకలు స్ట్రాంగ్‌ అవుతాయ్..

నల్ల కిస్‌మిస్‌ ఎముకల ఆరోగ్యానికి మేలు చేస్తాయి. బోలు ఎముకల సమస్యతో బాధపడేవారికి.. నల్ల కిస్‌మిస్‌ ఔషదంలా పనిచేస్తాయి. దీనిలో బోరాన్ పరిమాణం ఎక్కువగా ఉంటుంది. బోరాన్‌లో కాల్షియం కంటెంట్‌ ఎక్కువగా ఉంటుంది.. ఇది ఎముకలు, దంతాలు దృఢంగా ఉండటానికి సాయపడుతుంది.
బీపీ కంట్రోల్‌లో ఉంటుంది..
హైపర్‌టెన్షన్‌ సమస్యతో బాధపడేవారు.. నానబెట్టిన నల్ల కిస్‌మిస్‌ తీసుకోవాలని నిపుణులు చెబుతున్నారు. దీనిలో తక్కువ సోడియం, అధిక పొటాషియం ఉన్నందున హైపర్‌టెన్షన్‌ కంట్రోల్‌లో ఉంటుంది. నల్ల కిస్‌మిస్‌ చెడు కొలెస్ట్రాల్‌ను నియంత్రిస్తుంది. అధిక కొలెస్ట్రాల్‌ ట్రైగ్లిజరైడ్‌ స్థాయులు ఎక్కువగా ఉన్నవారికి, గుండె జబ్బులతతో బాధపడేవారు నల్ల కిస్‌మిస్‌ తీసుకుంటే మంచిది.

ఇమ్యూనిటీ పెరుగుతుంది..
ఎండుద్రాక్ష రోగనిరోధక శక్తిని పెంచుతుంది. చర్మాన్ని మృదువుగా ఉంచుతుంది. సంతానోత్పత్తి సమస్యలను నివారించడంలోనూ ఉపయోగ పడుతుంది. జుట్టును సంరక్షిస్తుంది. క్యాన్సర్‌ కారకాలను నివారిస్తుంది.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.