Tips For Eye health: డిజిటల్ యుగంలో.. ల్యాప్టాప్లు, మొబైల్స్ స్క్రీన్స్ చూడకుండా రోజు గడవదు. వయసుతో పాటు కంటి చూపు క్షీణించడం సర్వసాధారణం. కానీ ఈ రోజుల్లో చిన్నవయసులోనే మందపాటి కళ్లద్దాలు వచ్చేస్తున్నాయి. డీజిటల్ స్క్రీన్స్ ఎక్కువగా వాడటం కారణంగా బ్లర్డ్ విజన్, కంటిలో మచ్చలు, కంట్లో నీళ్లు, కంటి నొప్పు, కళ్లు అదరడం వంటి సమస్యలు ఎక్కువ అవుతున్నాయి. కంటి సమస్యలను దూరం చేయడానికి, కళ్ల ఆరోగ్యాన్ని కాపాడుకోవడానికి ఆయుర్వేద వైద్యురాలు ఐశ్వర్య సంతోష్ (Dr.Aiswarya Santhosh, Ayurveda doctor) కొన్ని సహాజ మార్గాలను ఇన్స్టాగ్రామ్ పోస్ట్లో షేర్ చేశారు.
త్రిఫల..
త్రిఫల కంటి సమస్యలకు ఔషధంగా పనిచేస్తుంది. త్రిఫల కంటిశుక్లం వచ్చే ప్రమాదాన్ని తగ్గిస్తుంది. త్రిఫలాలు అంటే.. ఉసిరికాయ, తానికాయ, కరక్కాయ. వీటితో చేసిన చూర్ణం మనకి మార్కెట్లో దొరుకుతుంది. ఈ చూర్ణానికి యాంటీ ఏజింగ్, యాంటీ బ్యాక్టీరియల్ గుణాలు ఉంటాయి. మీకు కంటి సమస్యలు ఉంటే.. రాత్రిపూట త్రిఫల చూర్ణాన్ని నెయ్యి, తేనెతో సమాన పరిమాణంలో కలిపి తీసుకుంటే మంచిదని డాక్టర్ ఐశ్వర్య సంతోష్ సూచించారు. త్రిఫల చూర్ణాన్ని ఎక్కువ కాలం సేవించకూడదని పేర్కొన్నారు.
ఉసిరి..
ఉసిరిలో అనేక ఔషధ గుణాలు ఉన్నాయి. ఉసిరి తీసుకుంటే ఎన్నో ఆరోగ్య సమస్యలు దూరం అవుతాయి. ఉసిరి కంటి ఆరోగ్యానికి మేలు చేస్తుంది. ఉసిరికాయ తింటే.. కండ్లకలక, గ్లాకోమా వంటి వ్యాధుల నుంచి ఉపశమనం లభిస్తుంది. ఇందులో ఉండే విటమిన్ సి రెటీనా కణాలను నిర్వహించడంలో కీలక పాత్రపోషిస్తుంది. ఇది ఆరోగ్యకరమైన కేశనాళికలని (capillaries) ప్రోత్సహిస్తుంది. ముఖ్యంగా డయాబెటిక్ రెటినోపతితో బాధపడేవారికి ఉసిరి మేలు చేస్తుంది.
ఎండు ద్రాక్ష..
ఎండుద్రాక్షలో ఉండే పాలీఫెనోలిక్ ఫైటోన్యూట్రియెంట్లు.. కంటి చూపును దెబ్బతీసే ఫ్రీ రాడికల్స్ను తొలగిస్తాయి. కంటి ఆరోగ్యాన్ని రక్షించుకోవడానికి ప్రతి రోజూ ఉదయం నానబెట్టిన ఎండు ద్రాక్ష తీసుకోవడం మంచిది.
తేనె..
కంటికి సంబంధించి ఏ సమస్య ఉన్నా.. తేనె గొప్ప ఔషధంలా పనిచేస్తుంది. తేనెలో యాంటిసెప్టిక్, యాంటీ బయాటిక్, విటమిన్ బి 1, విటమిన్ బి6 సమృద్ధిగా ఉంటాయి. తేనె తీసుకుంటే కంటి చూపు మెరుగుపడుతుంది. క్యారెట్ జ్యూస్లో కాస్త తేనెను కలుపుకొని తాగితే కంటి చూపు మెరుగయ్యే అవకాశం ఉంది.
నెయ్యి..
నెయ్యిలో విటమిన్ ఎ పుష్కలంగా పుష్కలంగా ఉంటుంది. విటిమిన్ A కంటి చూపును మెరుగుపరుస్తుంది. ఆయుర్వేదంలో కంటి సమస్యలను దూరం చేయడానికి నెయ్యిని ఔషదంలా వాడతారు.
రాక్ సాల్ట్..
రాక్ సాల్ట్ కళ్ల ఆరోగ్యానికి మేలు చేస్తుందని నిపుణుల చెబుతున్నారు. మీ వంటల్లో రాక్ సాల్ట్ వాడితే.. కంటి సమస్యలు దూరం అవుతాయని సూచిస్తున్నారు.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.