మెగా ప‌వ‌ర్ స్టార్ రామ్ చ‌ర‌ణ్ RRR మూవీ రిలీజ్ కోసం ఎంతో ఆతృత‌గా ఎద‌రు చూశారు. కానీ కోవిడ్ ప్ర‌భావం పెరుగుతుండ‌టం..దేశ వ్యాప్తంగా థియేట‌ర్స్ మూత ప‌డటంతో RRR సినిమాను మేక‌ర్స్ వాయిదా వేశారు. RRR పాన్ ఇండియా రేంజ్ మూవీ. రామ్ చ‌ర‌ణ్ హీరోగా త‌న మార్కెట్‌ను పెంచుకోవ‌డానికి RRR ఓ స్టెప్పింగ్ స్టోన్ మూవీ అవుతుంద‌న‌డంలో సందేహం లేదు. దీన్ని దృష్టిలో పెట్టుకునే చెర్రీ త‌న త‌దుప‌రి ప్రాజెక్ట్‌ల‌ను ఎంచుకుంటున్నారు. త‌దుప‌రి సినిమాలను కూడా పాన్ ఇండియా రేంజ్‌లోనే చ‌ర‌ణ్ ప్లాన్ చేసుకుని అందుకు త‌గ్గ‌ట్టు ప్రాజెక్టుల‌ను డిసైడ్ చేసుకుంటున్నారు. ఈ క్ర‌మంలో RRR త‌ర్వాత రామ్ చ‌ర‌ణ్ చేస్తున్న చిత్రం స్టార్ డైరెక్ట‌ర్ శంక‌ర్ ద‌ర్శ‌క‌త్వంలో. RC15గా రూపొందుతోన్న ఈ భారీ చిత్రం ప్ర‌స్తుతం షూటింగ్ ద‌శ‌లో ఉంది.

RC15 షూటింగ్‌ను శంక‌ర్ ఇప్ప‌టికే కొంత మేర‌కు పూర్తి చేశారు. లేటెస్ట్‌గా ఈ సినిమా రిలీజ్ డేట్‌ను నిర్మాత దిల్ రాజు రీసెంట్ ఇంట‌ర్వ్యూలో తెలియ‌జేశారు. అన్నీ అనుకుంటున్న‌ట్లు ప్లానింగ్ ప్ర‌కారం జ‌రిగితే, రామ్ చ‌ర‌ణ్ – శంక‌ర్ సినిమాను 2023 సంక్రాంతికి విడుద‌ల చేస్తామ‌ని ప్ర‌క‌టించారు. అంటే మ‌రో సంక్రాంతికి కూడా సంద‌డి చేయ‌డానికి దిల్ రాజు ప్లాన్ చేసేశారు. ఇత‌ర నిర్మాత‌లంద‌రి కంటే ముందే సంక్రాంతి బెర్తుని క‌న్‌ఫ‌ర్మ్ చేసేసుకున్నార‌న్న‌మాట‌.

‘ఆర్ఆర్ఆర్’ సినిమాను పూర్తి చేసిన రామ్‌చ‌ర‌ణ్ ఆ వెంట‌నే పాన్ ఇండియా రేంజ్‌లో సినిమా చేయాల‌నుకుని శంక‌ర్‌తో చేతులు క‌లిపారు. తెలుగు నిర్మాత‌లు దిల్‌రాజు, శిరీశ్ ఈ చిత్రాన్ని భారీ బడ్జెట్‌తో నిర్మించ‌డానికి రెడీ అయ్యారు. వీరు నిర్మిస్తోన్న తొలి పాన్ ఇండియా మూవీ ఇది. రామ్‌చ‌ర‌ణ్ 15వ సినిమా ఇది. ఇందులో రామ్‌చ‌ర‌ణ్‌ను స‌రికొత్త లుక్‌తో, క్యారెక్ట‌రైజేష‌న్‌తో శంక‌ర్ ప్రెజెంట్ చేయ‌బోతున్నారు. క‌లెక్ట‌ర్‌గా, మ‌రో వేరియేష‌న్‌లో ముఖ్య‌మంత్రిగా రామ్‌చ‌ర‌ణ్ క‌నిపించ‌బోతున్నార‌ట‌.

బాలీవుడ్ బ్యూటీ కియారా అద్వానీ ఇందులో హీరోయిన్‌గా న‌టిస్తోంది. సునీల్ కీల‌క పాత్ర‌లో న‌టిస్తున్నారు. త‌మ‌న్ ఈ చిత్రానికి సంగీతాన్ని అందిస్తున్నారు. సాధార‌ణంగా శంక‌ర్ సినిమా అంటే సంచ‌ల‌నాల‌కు కేరాఫ్ అడ్ర‌స్ అనొచ్చు. మ‌రి పొలిటికల్ థ్రిల్లర్‌గా రూపొందుతున్న ఈ సినిమాతో శంక‌ర్ ఎలాంటి సంచ‌నాల‌కు తెర తీయ‌బోతున్నారో చూడాలి.