న్యుమోనియా ఎందుకు వస్తుంది..?
న్యుమోనియా వైరస్, బ్యాక్టీరియా, ఫంగస్, ప్రోటోజువాల వలన సోకుతుందని వైద్య నిపుణులు చెబుతున్నారు. మనం శ్యాస తీసుకుంటున్నప్పుడు గాలితో పాటుగా సూక్ష్మజీవులు శరీరంలోకి ప్రవేశించి, కొద్దికాలానికి తెల్లరక్తకణాలను నిర్వీర్యం చేస్తాయి. దీంతో మన శరీరంలో ఇమ్యూనిటీ తగ్గిపోతుంది.. శరీరంలోకి ప్రవేశించే సూక్ష్మజీవుల సంఖ్య ఎక్కువుగా ఉన్నా, శరీరంలోని వ్యాధి నిరోధక శక్తి వాటిని ఎదుర్కోలేకపోవచ్చు. CDC ప్రకారం, ఒమిక్రాన్‌ వైరస్, SARS-CoV-2, ఇన్ఫ్లుఎంజా, RSV వైరస్ కూడా న్యుమోనియాకు కారణం కావచ్చు.
వీరికి రిస్క్‌ ఎక్కువ..
ఆరోగ్య నిపుణుల అభిప్రాయం ప్రకారం, పిల్లలు, వృద్ధులు ఇద్దరూ సులభంగా నిమోనియాకు గురవుతారు. పిల్లలు, వృద్ధులకు ఇమ్యూనిటీ తక్కువగా ఉంటుంది. దీని కారణంగా.. వీరికి న్యుమోనియా త్వరగా ఎటాక్‌ అయ్యే అవకాశం ఉంది. ముఖ్యంగా చిన్నపిల్లల్లో రెస్సిరేటర్‌ సిన్సిషియల్‌ వైరస్(ఆర్‌ఎస్‌వీ), పెద్దవారిలో ఇన్‌ఫ్లూయోంజా వైరస్ వలన వచ్చే జలుబు, దగ్గు తర్వాత న్యుమోనియా తరచుగా వస్తుందని నిపుణులు చెబుతున్నారు. ఆల్కహాల్‌, స్మోకింగ్‌, మంచి ఆహారం తీసుకోనివారికి, డయాబెటిస్‌, హెచ్‌ఐవీ, క్యాన్సర్, గుండె, ఊపిరి తిత్తులు, మూత్రపిండాల సమస్యలతో బాధపడేవారికి.. ఇమ్యూనిటీ తక్కువగా ఉంటుంది. వీరికి న్యుమోనియా వచ్చే అవకాశాలు ఎక్కువగా ఉంటాయని నిపుణులు అంటున్నారు.
ఈ లక్షణాలు ఉంటాయి..
చలితో కూడిన జ్వరం, దగ్గు, కఫం, ఛాతీలో నొప్పి వంటి లక్షణాలు కనిపిస్తాయి. కొందరిలో దగ్గుతో పాటు రక్తం పడుతుంది. కొందరిలో కఫం చిక్కగా, కొందరిలో పలుచగా పడుతుంది. నోటి వెంట పడే కఫం రంగును బట్టీ వ్యాధి లక్షణాలు గుర్తించవచ్చు.
చిన్నపిల్లల్లో ఈ లక్షణాలు కనిపిస్తాయ్‌..
పసి పిల్లలకు, చిన్నారులకు న్యుమోనియా లక్షణాలు ఉండకపోవచ్చని మయోక్లినిక్‌ వెల్లడించింది. కొన్ని సందర్భాల్లో న్యుమోనియా కారణంగా వాంతులు, జ్వరం, దగ్గు, అలసట, శ్వాస తీసుకోవడంలో ఇబ్బంది కూడా ఉండవచ్చు.
బ్యాక్టీరియల్‌ న్యుమోనియాలో ఈ లక్షణాలు కనిపిస్తాయి..
జాన్స్ హాప్కిన్స్ ప్రకారం, బాక్టీరియల్ న్యుమోనియాలో కొన్ని తేలికపాటి, తీవ్రమైన లక్షణాలు ఉంటాయి.
- పెదవులు, గోళ్లు నీలంగా మారడం
- జ్వరం
- దగ్గు, ఆకుపచ్చ, పసుపు కఫం, కఫంలో రక్తం పడటం
- ఆకలి లేకపోవడం
- చెమట పట్టడం
- శక్తి లేకపోవడం
- ఆయాసం
- పల్స్‌ వేగంగా ఉండటం
- చలి
- ఛాతీ హెవీగా ఉండటం
వైరల్‌ న్యుమోనియా లక్షణాలు..
వైరల్‌ న్యుమోనియా లక్షణాలు.. బ్యాక్టీరియా న్యూమోనియా మాదిరిగానే ఉంటాయి.
- తలనొప్పి
- శ్వాస ఆడకపోవడం
- కండరాల నొప్పి
- బలహీనత
- దగ్గు ఎక్కువగా రావడం
ఎలా నిర్థరించాలి
JOHNS HOPKINS ప్రకారం, ఎక్స్-రే, రక్త పరీక్ష, కఫ పరీక్ష, ఛాతీ CT స్కాన్, బ్రోంకోస్కోపీ వంటి పరీక్షలతో.. న్యూమోనియాను నిర్ధఱించవచ్చు. న్యూమోనియాను ఇంట్లోనే టెస్ట్‌ చేసుకోవచ్చు. ఈ ఇన్ఫెక్షన్‌ పల్స్‌ ఆక్సిమీటర్‌తో గుర్తించవచ్చు. పల్స్‌ ఆక్సిమీటర్‌ మన రక్తంలో ఆక్సిజన్‌ లెవల్‌ను మెజర్‌ చేస్తుంది. న్యూమోనియా కారణంగా.. రక్తంలో ఆక్సిజన్‌ స్థాయిలు తక్కువగా ఉంటాయి.
ఇలా నివారించండి..
- పిల్లలకు చిన్నతనంలో ఇచ్చే బీసీజీ, పెర్టుసస్‌లతో పాటు నిమోకోకల్‌ వ్యాక్సిన్‌ ఇవ్వడం వల్ల చిన్నారుల్లో దీన్ని నివారించవచ్చు.
- బిడ్డకు ఆరు నెలల వయస్సు వచ్చే వరకూ తల్లిపాలు ఇవ్వడం, చక్కని శుభ్రత పాటించడం వలన చిన్నారుల్లో న్యుమోనియా రాకుండా చాలా వరకూ నివారించవచ్చు
- ఆల్కహాల్‌, స్మోకింగ్‌ అలవాటు ఉంటే వెంటనే మానేయండి.
- పొగకు ఎక్కువగా ఎక్స్‌పోజ్‌ కాకుండా చూసుకోవాలి.
- రోజు వ్యాయామం చేయడం మంచిది.
- పోషకాహారం తీసుకోండి. ఆరోగ్యకరమైన ఆహారం తీసుకుంటే ఇమ్యూనిటీ పెరుగుతుంది.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.