ఉత్కటాసనం..

ఉత్కటాసనాన్ని చైర్ పోజ్ అని కూడా పిలుస్తారు. ఈ ఆసనం పాదాలు, తుంటి, తొడల కండరాలపై పనిచేస్తుంది. సహజంగానే ఊహాత్మక కుర్చీపై కూర్చోవడం కండరాలపై మరింత ఒత్తిడిని కలిగిస్తుంది. పాదాల ఒత్తిడి కారణంగా హిప్స్‌, తొడలు పని చేస్తాయి. ఇది కొవ్వును కరిగించడంలో మాత్రమే కాకుండా కాళ్లను టోన్ చేయడంలో సహాయపడుతుంది, వాటిని బలపరుస్తుంది.
వీరభద్రాసనం..

ఈ ఆసనాన్ని యోధుల భంగిమ అని కూడా అంటారు. ఈ ఆసనం తొడలపై ప్రభావం చూపుతుంది. ఈ ఆసనం రోజూ ప్రాక్టిస్‌ చేస్తే తొడలలో కొవ్వు కరుగుతుంది.
ఎలా చేయాలి..
సమస్థితిలో నిలబడి శ్వాస తీసుకుంటూ కుడిచేతిని ముందు నుంచి స్ట్రెచ్ చేస్తూ పైకి తీసుకువెళ్లి, శ్వాస వదులుతూ కుడిచేతిని ఎడమకాలును సమాంతరంగా ఉంచి ముందుకు వంగాలి. నేలకు సమాంతరంగా వంగినపుడు కుడిచెయ్యి ఎడమకాలు స్ట్రెయిట్ లైన్‌లో ఉండటం గమనించవచ్చు. ఎడమచేతిని నడుము పక్కనే నిటారుగా ఉంచాలి. చేతివేళ్లు కూడా స్ట్రెచింగ్ పొజిషన్‌లో ఉండటం గమనించగలరు. 5 సాధారణ శ్వాసల తరువాత శ్వాస తీసుకుంటూ కుడిచేతిని పైకి ఎడమకాలును క్రిందకు, శ్వాస వదులుతూ కుడిచేతిని భూమివైపు చూపిస్తూ, కుడిపక్క నుండి క్రిందకు నడుము పక్కకి తీసుకురావాలి. మళ్లీ సమస్థితికి రావాలి. ఇదే విధంగా రెండోవైపు కూడా చేయాలి.
నటరాజసనం..

ఈ ఆసనం తుంటి, తొడలపై ప్రభావం చూపుతుంది. నటరాజసనం తొడల లోపలి, బయటి భాగాల కండరాలకు వ్యాయామంగా సహాయపడుతుంది. ఈ ఆసనం మీ కటి నుంచి పాదాల వరకు కాలులోని ప్రతి కండరానికి టోన్ తెస్తుంది. ఇది పాదాలలో రక్త ప్రసరణను మెరుగుపరుస్తుంది. నడుముకు వ్యయామం అయ్యి సన్నబడుతుంది.
ఎలా వేయాలి..
ముందుగా నిటారుగా నిలబడాలి. ఊపిరి తీసుకుంటూ కుడి కాలిని వెనక్కి వంచి కుడి మడమని కుడి చేత్తో పట్టుకోవాలి. మీ కుడి కాలిని ఎంత పైకి లేపగలిగితే అంత పైకి లేపాలి. ఎడమ చేతిని ముందుకు చాచాలి. మామూలుగా శ్వాస తీసుకుంటూ ఇలా ఇరవై ముప్ఫై సెకన్లు ఉండాలి. నెమ్మదిగా మామూలు పొజిషన్ లోకి రావాలి. ఇలాగే మళ్లీ ఎడమ కాలితో కూడా చెయ్యాలి. ఇలా రెండు మూడు నిమిషాల పాటూ చేయడం మంచిది.
పర్వతాసనం..

ఈ ఆసనం వల్ల రక్తప్రసరణ సాఫీగా సాగుతుంది. శరీర భాగాలు బిగుసుకుపోక, కదలికలు తేలికవుతాయి. ఈ ఆసనం ప్రాక్టిస్ చేస్తే.. బెల్లీ ఫ్యాట్‌ కరుగుతుంది. ఈ ఆసనం కొండ ఆకృతిని తలపించేదే పర్వతాసనం. ముందుగా నిలబడి మెల్లగా శ్వాస వదులుతూ రెండు చేతులూ రెండు పాదాల పక్కన పెట్టాలి. ముందు కుడికాలును, తర్వాత ఎడమకాలును వెనక్కి జరపాలి. పాదాలు పూర్తిగా కింద ఆనించి ఉంచాలి. తల, భుజాలు మోకాళ్ల వైపు వెళ్లాలి. వీపు, మోకాళ్లు వంచకూడదు. తిన్నగా ఉండేలా చూడాలి. ఈ స్థితిలో ఉండగలిగినంత సేపు ఉండి, మెల్లగా మోకాళ్లను కింద పెట్టేసి కూర్చున్న స్థితిలో రిలాక్స్‌‌ అవ్వాలి.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.