మహిళల ఆరోగ్యంలో ఈస్ట్రోజన్‌ హార్మోన్‌(Estrogen harmone) కీలక పాత్ర పోషిస్తుంది. శరీరంలోని జీవక్రియలకు ఈస్ట్రోజన్‌ చాలా అవసరం. ఈస్ట్రోజన్‌‌ మహిళలలో నెలసరి, పునరుత్పత్తి వ్యవస్థను, లైంగిక కోరికలను నియంత్రిస్తుందని చాలా మందికి తెలుసు. ఎముకలు బలంగా ఉండటానికి, గుండె ఆరోగ్యాన్ని రక్షించడానికి, శరీర పనితీరు మెరుగుపరచడానికీ ఈస్ట్రోజన్‌ అవసరం. మహిళలలు ఆరోగ్యంగా ఉండాలంటే.. ఈస్ట్రోజన్‌‌‌ హార్మోన్‌ స్థాయులు సమతుల్యంగా ఉండాలని వైద్యులు, నిపుణులు చెబుతున్నారు.

శరీరంలో ఈస్ట్రోజన్ హార్మోన్‌ తగ్గితే, శరీరంలో చాలా మార్పులు జరుగుతాయి. నెలసరి క్రమం తప్పడం, బ్లీడింగ్‌ తక్కువగా అవ్వడం లేదా పూర్తిగా కనిపించకపోవడం జరుగుతుంది. అండాశయాలు పూర్తిగా తగ్గి గర్భాధారణ సమస్యలు వస్తుంటాయి. మూడ్ స్వింగ్స్‌, ఆందోళన, కొపం, ఒత్తిడి, నిద్ర సమస్యలు, అలసట వంటి సమస్యలు వస్తుంటాయి. ఈస్ట్రోజన్‌ స్థాయులు తగ్గితే పొట్ట చుట్టూ కొవ్వులు పేరుకుపోతాయి, బరువు పెరుగుతారు. యోనీ పొడిబారిపోయి సెక్స్ సమయంలో నొప్పిగా అనిపిస్తుంది. రాత్రిసమయంలో సరిగా నిద్రపట్టకపోవటం, కళ్లు పొడిబారిపోతుంటాయి. మెదడులోని హైపోథలామస్‌‌‌‌‌ హార్మోన్ పనితీరు ఈస్టోజన్ హార్మోన్ కారణంగా తగ్గుతుంది. దీని వల్ల రాత్రి సమయంలో చెమటలు పోయటం, వేడి ఆవిర్లు వంటి లక్షణాలు కనిపిస్తాయి.

ఈస్ట్రోజన్ స్థాయిలను బ్యాలెన్స్‌‌లో ఉంచుకోవడానికి ఎన్నో మందులు, చికిత్సలు అందుబాటులో ఉన్నాయి. ఆహారంలో మార్పు చేసుకుని, క్రమం తప్పకుండా వ్యాయామం చేస్తే ఈస్ట్రోజన్‌‌‌‌‌‌‌‌‌ స్థాయులు సమతుల్యంగా ఉంటాయని నిపుణులు చెబుతున్నారు. జీడిపప్పును క్రమం తప్పకుండా తీసుకుంటే.. ఈస్ట్రోజన్‌ లెవల్స్‌‌‌ బ్యాలెన్స్‌లో ఉంటాయని ప్రముఖ పోషకాహార నిపుణురాలు భక్తి కపూర్ అన్నారు. ఈస్ట్రోజన్‌ లెవల్స్‌ కంట్రోల్‌ చేయటంలో జీడిపప్పు ఎలా సహాపడుతుందో వివరిస్తూ.. ఇన్‌స్టాగ్రామ్‌‌‌‌లో స్టోరీ షేర్‌ చేశారు. జీడిపప్పులో ప్రోటీన్, ఆరోగ్యకరమైన కొవ్వులు, యాంటీఆక్సిడెంట్లకు పుష్కలంగా ఉంటాయని భక్తి కపూర్‌ అన్నారు. ఇది మహిళల్లో హార్మోన్లను సమతుల్యం చేయడానికి సహాయపడుతుందని చెప్పారు. జీడిపప్పులో ఉండే అనాకార్డిక్‌ యాసిడ్‌కు యాంటీ- ఈస్టోజన్‌ లక్షణాలు ఉంటాయి. గుప్పెడు జీడిపప్పులో దాదాపు 20 మిల్లీగ్రాముల అనాకార్డిక్ యాసిడ్ ఉంటుంది. మహిళలు రోజూ జీడిపప్పు తింటే మేలు జరుగుతుందని భక్తి కపూర్‌ అన్నారు.

ఈస్ట్రోజన్‌ ఎక్కువైనా ప్రమాదమే..
కొందర్లో అవసరానికి మించి ఈస్ట్రోజన్‌ హార్మోన్‌ పెరుగుతుంది. ఈ పరిస్థితిని ఈస్ట్రోజన్‌ డామినెన్స్‌ అంటారు. ఈస్ట్రోజన్‌ స్థాయులు పెరిగితే.. కడుపు ఉబ్బరం,భావోద్వేగాలు అదుపు తప్పడం,తలనొప్పి, అలసట, నెలసరి సమస్యలు,అరిచేతులు, అరికాళ్లు చల్లబడడం, బరువు పెరగడం, వెంట్రుకలు రాలిపోవడం, జ్ఞాపకశక్తి సమస్యలు వంటి లక్షణాలు కనిపిస్తాయి. శరీరంలో ఈస్ట్రోజన్‌ స్థాయులు పెరిగితే రొమ్ముక్యాన్సర్‌, అండాశయ క్యాన్సర్‌ వచ్చే ప్రమాదం ఉంది. అమెరికన్‌ క్యాన్సర్‌ సొసైటీ (ACS) అధ్యయనం ప్రకారం, ఈస్ట్రోజన్‌ స్థాయులు పెరిగితే ఎండోమెట్రియల్‌ క్యాన్సర్‌ ప్రమాదాన్ని పెంచుతుంది. ఈస్ట్రోజన్‌ లెవల్‌ పెరిగితే రక్తం గడ్డకట్టడం, స్టోక్‌ వంటి సమస్యలు వచ్చే ప్రమాదం ఉంది.
ఎన్ని తినాలి..

ఈస్ట్రోజన్‌ స్థాయులు తక్కువగా ఉన్నవారు రొజుకు పావు కప్పు జీడిపప్పు తింటే మంచిదని భక్తి కపూర్‌ సూచించారు. జడిపప్పు ఎక్కువగా తిన్నా ఆరోగ్య సమస్యలు ఎదుర్కోవాల్సి వస్తుందని అన్నారు.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.